Gönguhópur.

Æfingar:

Gönguhópurinn æfir 2var sinnum í viku. Á þriðju- og fimmtudögum göngum við úti og blöndum við þá saman gönguferðum, þol- og styrktarþjálfun.

Þriðjudagar kl. 18:10 við sundlaug

Fimmtudagur kl. 18:10 við sundlaug

Markmið þjálfunar:

Þol- og styrktarþjálfun þar sem áhersla er lögð á markvissa þjálfun hjarta- æða-, og lungnakerfis, ásamt stæðstu vöðvahópum líkamans. Þjálfunin miðar einkum að því að efla getu og hæfni einstaklingsins til hvers konar útiveru, þó svo megin áherslan hér sé lögð á gönguferðir til fjalla eða á láglendi. Reglulega látum við hópinn taka þolpróf þar sem hver og einn getur fylgst með sínum framförum. Við leggjum áherslu á að hver og einn fái þjálfun við sitt hæfi og högum við æfingum þannig að allir eiga að geta unnið á sínum hraða. Árangur æfinganna miðast út frá hverjum einstakling en ekki alls hópsins.

Gönguferðir:

Í hverjum mánuði er farin ein dagsferð og þá er gengið annað hvort á laugar- eða sunnudegi. Þessi dagsganga getur annarsvegar verið á fjall eða verið ganga um áhugaverðar slóðir án mikillar hækkunar.

Nokkuð hefur verið um fyrirspurnir um hvort þeir sem ekki eru í gönguhópnum megi koma með í helgargöngurnar. Við bjóðum alla velkomna en fararstjórar geta snúið einstaklingum frá ef þeir meta það svo að útbúnaður eða líkamleg geta sé ekki til staðar fyrir tiltekna gönguferð.

 

Tryggingar:

Þátttaka í gönguhópi Vatns og heilsu er alfarið á eigin ábyrgð. Þátttakendur eru ekki tryggðir á æfingum né í helgargönguferðum og er það í samræmi við venjur varðandi fjallgöngur, þjálfun og útivist hverskonar. Bendum við ykkur á að kanna hvernig þið eruð tryggð í tómstundum hjá ykkar tryggingarfélagi, oft er þetta innan heimilistryggingar.

Bensínspeningur:

Í helgarferðum notum við einkabíla til að koma okkur á milli staða og skipta farþegar bensínkostnaðinum á milli sín. Við höfum verið að skoða hvernig aðrir sambærilegir hópar haga þessu hjá sér og komumst við að þessari niðurstöðu.

Farþegar taka þátt í bensínkostnaði með því að greiða bílstjóra hvers bíls fyrir sig – viðmiðið er 1000 kr fyrir hvern klukkutíma í akstri fyrir hvern farþega.

Dæmi: Tveggja tíma akstur (1 klst hvor leið) með 3 farþega eru samtals 6000.- eða 2000.- á hvern farþega.

Útbúnaðarlisti:

Gönguskór: Í gönguferðir að velja skó sem þið eruð búin að ganga til og styðja vel við ökkla.

Bakpoki: 20-35 l poki er góður í dagsgöngur. Athugið að pokinn henti ykkur, að hann sitji vel á baki og hafi góðar ólar, nauðsynlegt er að pokinn sé með mittisól.

Göngustafir: Betra að hafa tvo en einn, léttir álag á fætur.

Innsta lag:

Nærföt – ullarbolur og ullarbuxur (föðurlandið) er best. Aldrei að klæðast bómullarfötum.

Milli lag:

Göngubuxur – úr flís eða öðru sambærilegu viðurkenndu efni. Hversu þykkar þær þurfa að vera fer eftir á hvaða árstíma gengið er. Aldrei að klæðast gallabuxum í gönguferðum.

Þunn peysa – úr flís eða ull er best. (1-2 stk)

Ysta lag:

Vind- og vatnsheld utanyfir föt (gore-tex) – alltaf að hafa með í bakpokanum.

Þunn dúnúlpa – gott að fara í í pásum, kemur í stað einnar peysu.

Hanskar / vettlingar – úr ull eða flís er best. Alltaf að hafa með í bakpokanum.

Belgvettlingar vatns- og vindheldir – eru nauðsynlegir í vetrargöngum.

Húfa / lambhúshetta / ennisband – alltaf að hafa með í bakpokanum.

Göngusokkar – þykkir eða þunnir fer eftir á hvaða árstíma gengið er.

Legghlífar

Annað:

Sólgleraugu

Skíðagleraugu

Sólarvörn

WC pappír

Kjarngott nesti – ásamt nasli til að maula jafnt og þétt á göngu.

Vatn eða aðra drykki – í lengri göngum að hafa með sér ca. 2 l af vökva. Yfir köldustu mánuðina getur verið gott að hafa heitt á brúsa.